Eksaktong isang buwan bago mag-Pasko, napagdiskitahan ko ang isang napakalaking problema na hinaharap ng mga Pilipino. Ano ang alternatibong mistletoe para sa mga Pilipino? Mahigit dalawang dekada na akong nabubuhay sa mundo pero hindi pa ako nakakakita ng isang totoong mistletoe. Kasalanan ito ni Justin Bieber. Dahil alam naman natin na si Bieber ang pinagmumulan ng lahat ng problema sa mundo. Sa dami ng humahangang batang babae sa The Biebs, siguradong papangarapin nila na mahalikan sa ilalim ng isang mistletoe. Rume-reggae pa ang tukmol sa kanyang bagong sikat na kanta. Romantikong binitawan ang mga linyang, “With you, shawty with you/With you, shawty you/With you/Under the mistletoe.” Nakaka-in love. Sobra.
Kung paniniwalaan ang Wikipedia, ang mistletoe ay karaniwang pangalan para sa obligate hemi-parasitic plants. Obligate na. Hemi-parasitic pa. Hindi ko alam kung ano ang ibig sabihin ng obligate pero meron naman akong konting kaalaman kung ano ang parasitic. Parasites. Parasitiko. Peste. Kadalasang halaman o hayop na free-loaders na madalas nakiki-squatter sa kanilang kapwa halaman o hayop upang mabuhay na karaniwang nakikita sa Europe at North America. Para mas simple, meron ka bang friend na madalas mangutang o manghiram ng kung anu-anong gamit sa iyo? Yung tipong sumusobra na ang kakapalan ang mukha? Yung tipong nauubusan ka ng lakas kapag umaali-aligid siya sa iyo? Yan ang parasite. So ganoon pala ang isang mistletoe. Paano? Tumutubo kasi ang mga ito sa mga branches ng puno o shrubs sa pamamagitan ng ebs ng mga ibon. Ah. Gets. Ebs?! Yuck.
Mula sa halamang lumago sa pamamagitan ng ebs ng mga ibon, naging simbulo ng pag-ibig ang mistletoe. Sisihin ang kulturang Scandinavian, “The mistletoe is still hung up in farm-houses and kitchens at Christmas, and the young men have the privilege of kissing the girls under it, plucking each time a berry from the bush. When the berries are all plucked the privilege ceases.” — Washington Iriving. Naks. No choice ka kapag nagkataong parehong nasa ilalim ng isang mistletoe ang isang babae at isang lalaki. You need to kiss. Kung meron shotgun wedding, ito naman ang shotgun kissing.
Subalit dahil hindi naman kasama sa Europe at North America ang Pilipinas, eh kailangan ng alternatibong mistletoe. Bakit, ang lagay sila lang ang maaaring umimbento ng tradition?
Kissing Underneath the Mango Tree. Kung pagbabasehan ang pelikula nina Jericho Rosales at Kristine Hermosa, nagiging matamis ang bunga ng mangga kapag totoo at lubos ang pagmamahalan ng magkasintahan. Sino ba naman ako para kumontra sa ganitong siste. Pero lumang eksena na ito dahil meron pang isang kilalang local cinema love team na nagpauso nito. Panoorin sila dito. Binansagan bilang the ultimate love team dahil marahil sila ang nagpauso nito, sino ba ang kokontra kina Carmen at Rogelio?
Kissing Underneath the Billboards. Dahil mas maraming billboards kaysa puno sa pinakamatrapik na kalsada sa buong Pilipinas.
Kissing Underneath the Red Umbrella. Nasa menopausal stage na marahil si Mother Earth. Sala sa init at sala sa lamig. Madalas biglaan na lamang na nagpapaulan. So malaki ang tsansang magkakaroon ng sukuban portion. Sakaling makakita ka ng kakilala o total stranger na may hawak na pulang payong habang umuulan, makisukob ka at halikan ito. Malas mo lang kung meron siyang peper spray o nasa speed dial ang pinakamalapit na presinto. Para sigurado, siguraduhin na kamukha mo si Anton Del Rosario o Solenn Heusaff para hindi magreklamo ang hahalikan mo.
Kissing Underneath the Parol. Paskong-Pasko. Pilipinong-Pilipino. Saan ka pa?
Kissing Underneath the Big Dome Basketball Ring. Para sa mga sports fan. Para sa mga basketball fans. Big Dome lang? Oo naman. Kailangan natin ng qualifier. Sa dami ng basketball courts sa Pilipinas dahil tila kabilang ito sa priority projects ng ating mga kongresista – baka puro halikan na lang maganap dito. Off-topic: di pa rin ako maka-move on sa pangalan na Smart Araneta Coliseum. I just cannot do it.
Kissing Underneath the Araneta Center Christmas Tree. Tutal napag-usapan na rin ang Big Dome, isama na natin ang Christmas Tree sa tabi nito. Parang big deal lang talaga ang unveiling ng giant Christmas Tree sa gitna ng Cubao. Dinadagsa ng mga artista. Dinadagsa ng mga sponsors. Dapat dagsain na rin ito ng mga Christmas kissers. Mas maganda kung sasabayan ng maghahalikan ang unang pag-iilaw ng puno. Feeling Rockefeller Center lang.
Kissing Underneath the Iconic Fertility Tree. Hindi mo alam ang pinakasikat ng puno sa Unibersidad ng Pilipinas sa Los Banos?! Nasasaktan ako. Dapat alam mo ito. Hinding-hindi ipagpapalit ng mga Elbi people ang punong ito kahit katumbas pa tatlong Sunken Garden. Malaki. Malago. Malupit. Mas epektib sa Valentines ang punong ito pero pwede na rin kapag Pasko. Kung hindi mo naman ito feel, magandang alternatibo din si Pegaraw or Tamasus. Dili naman si Mariang Banga. Iwasan ang Kwek-Kwek Tower. Ni katiting na romantic value, wala ako nakikita sa istrukturang ito.
Kissing Underneath the UP Diliman Oblation. Para fair. Isang Los Banos. Isang Diliman. Paano naman ang ibang school? Taga-UP ako eh. Not familiar with the others.
Kissing Underneath the Rizal Monument in Luneta. Never mind the guards. Tapos dramahan mo ang kahalikan mo ng, “Alam mo bang nagpa-contest ang mga Amerikano noon sa magiging design ng monumento ni Rizal? First place si Carlos Nicoli subalit ibinigay ang kontrata sa second placer na si Richard Kissling. Bronze and granite din pala ang nasabing monumento.” Siguraduhin na geek ang kasama dahil baka mabasted ka pa sa mga pinagsasabi mo.
Marami ka nang pagpipilian. Problemahin mo na lang kung sino ang magiging kahalikan. Dagdagan mo rin ng fireworks para bongga. Pero kung lalaki ka, pigilan ang sarili na sambitin ang salitang bongga dahil marami ang magdududa. Siguraduhin din na hindi kanta Justin Bieber sakaling maisipan na haluan ng backrgound music. Naisip ko lang na hindi rin pala maganda ang pinagmulang source na nagmulat sa mga kabataan sa konsepto ng mistletoe. Ito ang Christmas song na I Saw Mommy Kissing Santa Claus. Balikan natin ang mensahe nito. “I saw Mommy kissing Santa Claus/Underneath the mistletoe last night/Then I saw Mommy tickle Santa Claus/Underneath his beard so snowy white/Oh, what a laugh it would have been/If Daddy had only seen/Mommy kissing Santa Claus last night.”
Tsk. Tsk. Tsk.
Adulterous ang kantang ito. Married na ang inang tinutukoy sa awitin pero pinili pa rin nitong makipaglampungan sa isa sa pinakakilalang fictional character sa mundo. Hindi pa nakuntento, kinikiliti pa nito si Santa. Ibang klaseng babae ito dahil sa mismong bahay pa isinasagawa ang extra-marital affairs na maaaring makita ng kanyang mga anak. Nakita na nga. Hindi naman nito pwedeng sabihin na kanyang asawa lamang ito na nakasuot ng Santa Claus costume dahil ayon mismo sa anak, isang malaking katatawanan sakaling mahuli ito ng kanyang ama. Taragis. Isa lamang naman ang aral na mapupulot dito: masama ang epekto ng mistletoe.
